​اشعار رو رو کر پیش کئے۔ آنسوؤں سے کاغذ بھیگ گیا۔

​اشعار ختم ہوئے، مالک کو رحم آگیا۔ سکون کی دولت مل گئی۔ آنسوؤں کے قطرے فوارے بن کر پھیلی ہوئی آگ پر برس رہے تھے۔ آگ بجھتی گئی بلکہ گلاب و یاسمین میں ڈھلتی گئی۔ سرکار صابر کی نگاہ کریمانہ بڑھی۔ دکھی، غمزدہ بے چین مسافر کو گلے لگا لیا۔ جسم میں جان آگئی۔ تھکاوٹ جاتی رہی۔ بخار اتر گیا۔ رونا تھم گیا، لبوں پر مسکراہٹ کھیلنے لگی۔ گلستان میں بہار آگئی۔

حجرہ مل گیا

​اسی اثناء میں ایک پُرکشش چہرے والا درویش آیا۔ ان صابری مہمانوں کو ساتھ لیا۔ سعید میاں والے حجرہ کے سامنے کھڑا ہو گیا اور کہا پنجابی ساتھیو یہ حجرہ سرکار صابرؒ نے آپ کو دیا ہے۔ یہ رہی اس کی چابی، یہ پانی کا پمپ، گھڑا، پیالہ اور مصلیٰ ہے۔ مزید کسی شے کی ضرورت ہو تو مجھ سے لے لینا۔ آرام سے رہو۔ یہاں سے دربارِ عالیہ کی مسجد قریب ہے۔ روضہ اقدس سامنے ہے۔ حجرہ نقارخانہ صابری کے ملحق ہے۔ سرکار کی خدمت میں آنے والے زائرین آپ کے سامنے سے گزریں گے۔ وہ حجرہ دے کر چلا گیا۔ حجرہ میں گلونے چٹائیاں اور مختصر سا سامانِ ضرورت رکھ لیا۔ ڈیرہ لگ گیا۔

​روزہ شروع ہو گیا

​تقسیم لنگر کی گھنٹی بجی۔ حاضرین و زائرین لنگر خانہ کی طرف چل دیئے۔ لنگر خانہ دربارِ عالیہ سے ملحق شمال کی جانب ہے۔ سرکار نے گلو سے فرمایا، جاؤ تم بھی لنگر لے آؤ۔ گلو برتن لئے لنگر خانہ پہنچا۔ اہلِ نظر لنگری نے کہا پنجابی دوست اپنا لنگر لے لو۔ گلو نے کہا ہم دو ساتھی ہیں۔ دو آدمیوں کا لنگر دیں۔ لنگری نے کہا بھئی لنگر صرف ایک آدمی کا ملے گا۔ وہ بھی تمہارا تمہارے ساتھی کا نہیں۔ گلو نے کہا، اگر میرے ساتھی کا لنگر نہیں ملے گا تو میں بھی نہیں لوں گا خالی واپس آ گیا۔ سرکار نے خالی لوٹنے کی وجہ پوچھی تو گلو نے کہا، لنگر صرف میرا ملتا ہے، آپ کا نہیں ملتا۔ اس لئے میں بھی نہیں لوں گا۔ فرمایا جاؤ تم لے لو، تم کھاؤ، میرا جس دن ملے گا کھا لوں گا۔ میں بھوک اور دیگر تکالیف کا مقابلہ کر سکتا ہوں مگر تم نہیں۔ میرا لنگر نہ ملنے کی وجہ سے تم پریشان نہ ہو۔ میں راضی برضا ہوں۔ سرِ تسلیم خم ہے جو مزاجِ یار میں آئے۔
​گلو کو لنگر ملتا رہا۔ مگر سرکار کا لنگر پورے تیس دن تک بند رہا۔ سرکار تیس دن متواتر روزے سے رہے۔ اس روزہ نے ریاضت و عبادات کا لطف دو چند کر دیا۔ یادِ الٰہی کے سہارے زندہ رہے۔ تعجب ہے اتنی مشکل سے پہنچنے والا عاشق جب بمشکل درِ محبوب پر پہنچا تو معشوق نے مہمان نوازی میں کھانا بند اور محنتِ شاقہ شروع کرا دی۔ ادھر وہ مہمان جو بصد مشکل حاضر ہوا تھا جس کے ساتھ سب سلوک روا رکھے جا رہے تھے۔ انتہائی مسرور تھا، خوش تھا اور اپنے لئے باعثِ فخر سمجھ رہا تھا۔ یہاں ایسے سلوک اپنوں سے روا رکھے جاتے ہیں۔

جہاں اتنی مخلوق اس لنگر پر پل رہی تھی۔ سب کو بلا بلا کر دیا جاتا ہے۔ وہاں ایک مہمان سے کیا کمی آتی مگر یہ سلوک اپنائیت کا ثبوت تھا اور سرکار زبانِ حال سے کہہ رہے تھے،

​ہاتف پکارا کہ جو شہباز، شکار پر وار اور پلٹ جھپٹ کے لئے مخصوص ہوتے ہیں انہیں مالک اپنی ہتھیلی پر بٹھا کر بھوک اور جگرا توں کی کٹھن منزل سے گزارتے ہیں۔ عاشق کے لئے درِ یار کی ہر تکلیف خوشی میں ڈھل جاتی ہے۔ ہر خار پھول نظر آتا ہے۔ ​سرکار بوقتِ سحری سادہ پانی اور دو گولوں سے روزہ رکھتے تھے۔ اور مزید دو گولوں اور پانی سے بوقتِ مغرب افطار فرما لیتے تھے۔ وقت نہایت سکون اور شرابِ طہور کی مستی میں سرشار بسر ہو رہا تھا۔

سیرِ عصر

​درگاہِ صابری کی جامع مسجد کے خطیب نہایت خدا رسیدہ بزرگ تھے۔ وہ میرٹھ کے رہائشی تھے اور درگاہِ صابری کی مسجد میں خطابت و امامت کے فرائض انجام دیتے تھے۔ عالم و فقیہہ ہونے کے علاوہ نہایت خوش خلق اور دانا انسان تھے۔ سرکار بعد از نمازِ کبھی کبھار ان کے پاس مسجد میں بیٹھ جاتے۔ پیار و محبت کی گفتگو ہوتی۔ علمی نکات بیان ہوتے۔ ایک روز اس بزرگ خطیب نے دورانِ گفتگو آپ کو مشورہ دیا کہ آپ ہمہ وقت حجرہ میں بیٹھا نہ رہا کریں بلکہ بوقتِ عصر سیر کیا کریں۔ ان کے مشورہ کے مطابق آپ نے سیرِ عصر کو معمول بنا لیا۔ ایک روز حسبِ معمول مع سائیں گلوسیر کو نکلے۔ دربارِ عالیہ کے قریب سے گزرنے والے ایک گندے نالے کے کنارے چل دیئے۔ کچھ دور نالے کے کنارے چند بچوں کا جھرمٹ دیکھا جو ہنس رہے تھے۔ اور نالے میں کسی پر پیہم ڈھیلے برسا رہے تھے۔ وہاں پہنچے تو کیا دیکھا کہ ایک ننگا دھڑنگا انسان محض لنگوٹی باندھے گندے نالے میں بیٹھا ہے۔ منہ میں پانی کی کلی بھر کر زور سے بچوں کی طرف پھونک دیتا ہے۔ بچے ہنستے اور دوڑتے ہیں۔ پھر ڈھیلے برسانے شروع کر دیتے ہیں۔ وہ آدمی پانی میں غوطہ لگا لیتا ہے۔ جب سرکار قریب پہنچے وہاں رک گئے۔ اچانک اس اجنبی غواطہ زن نے پانی سے سر نکالا اور آپ کی طرف دیکھا یکا یک خوبصورت اور چمکیلی آنکھوں نے مسحور کر دیا۔ آنکھوں میں ایک تعجب خیز منظر دکھائی دیا۔ یوں محسوس ہونے لگا جیسے یہ آنکھیں نہیں بڑے بڑے شیشے ہیں۔ ان شیشوں کے پار ایک خوبصورت اور دلکش جہاں آباد ہے۔ وہ جہاں اتنا دل آویز اور پیارا ہے کہ آنکھیں جھپکنے کا بھی ہوش نہ رہا۔ فرماتے تھے وہ کافی دیر اسی طرح تکتا رہا اور میں اس کی آنکھوں میں آنکھوں سے پرے کسی خوش منظر دنیا میں کھویا رہا۔ آخر اس نے آنکھیں بند کر لیں اور غوطہ لگایا۔ ہم واپس اپنے حجرہ میں آگئے۔ دل و دماغ میں وہ پیاری آنکھیں بس گئی تھیں۔ اب وہ آنکھیں دکھائی نہ دیتی تھیں۔ اضطراب بڑھنے لگا۔ طبیعت پر اداسی چھا گئی۔

​رات ہوگئی۔ ان آنکھوں کا تصور بھلائے نہ بھولتا تھا کہ اچانک بعد از نمازِ عشاء ایک آدمی سفید پائجامہ قمیض اور کپڑے کی رامپوری ٹوپی زیب تن کئے ہمارے حجرہ میں داخل ہوا۔ السلام علیکم کہا۔ سامنے والی چٹائی پر دو زانو بیٹھ گیا۔ آواز اور شکل و صورت کی تو پہچان نہ تھی۔ جب اس نے آنکھیں کھولی تو وہی پُرکشش آنکھیں پہچان لیں۔

​گفتگو شروع کی۔ گفتگو میں حلاوت اور پیار تھا۔ تمام رات ہمارے پاس رہے۔ صبح تک مسائلِ سلوک و تصوف، قرآن و حدیث کی روشنی میں بیان فرمائے۔ اس قدر محویت رہی کہ رات گزر گئی، مگر ہمیں خبر نہ ہوئی۔ صبح اذان ہوئی تو اُٹھ کر چل دیئے۔ فرمایا اب لوہا ٹھنڈا ہو چکا ہے۔ اب ہم چلتے ہیں۔ تمام رات سونے والے جاگ پڑے اور ہمیں جگانا چاہتے ہیں۔ تمام دن انتظار رہا۔ دوسری شب ٹھیک اسی وقت پھر تشریف لے آئے۔ محفل سوز و سخن گرم رہی انوار کی بارش برستی رہی۔ رموز و نکات کے موتی لٹتے رہے۔ تقریباً ہم نے اکٹھی گزاریں۔ راز ہائے سربستہ کھلتے رہے۔ خدا جانے وہ کون تھا؟ مہمان تھا یا صاحبِ خانہ تھا۔ ​جو کچھ بھی تھا عجب آزاد مرد تھا

کلیر کی گلیوں میں گدا

​ایک روز بوقت عصر سرکار نے گلو سے فرمایا، ’آج سیرِ عصر کے لیے کس سمت جانا ہے؟‘ عرض کی جو سمت آپ پسند فرماتے ہیں اسی طرف چل نکلتے ہیں۔ فرمایا میرا خیال ہے کہ آج ہم کلیر کے کوچوں میں گدا کریں۔ سیر بھی ہوگی، ریاضت بھی اور سخی کے گداؤں میں شمار بھی ہوگا۔ سنا ہے کہ کلیر کا منگتا کبھی خالی ہاتھ نہیں لوٹتا۔ گلو نے ایک مٹی کا لوٹا اٹھایا اور آپ نے ایک چنگیر لے لی۔

​گاؤں میں داخل ہوئے۔ پہلے ہی مکان کے دروازے پر کھڑے ہوگئے۔ دیکھا اندر عورتیں تنور پر روٹیاں لگا رہی تھیں۔ گلو نے صدا لگائی۔ عورتوں نے فقیروں کو دیکھا۔ پکی ہوئی تمام روٹیاں چنگیر میں ڈال دیں اور سارا آٹا لوٹے میں ڈال دیا۔ جس سے دونوں برتن بھر گئے۔ فرمایا بتاؤ اب گلی گلی اور در در جانے کی کیا ضرورت ہے؟ جب کہ ہمارے برتن تو پہلے ہی دروازہ پر بھر گئے۔

​فرمایا گلو اب تو اپنی تنگ دامنی پہ ندامت ہے۔ ہمارے دامن ہی تنگ تھے۔ دینے والے کا خزانہ تو کم نہ تھا۔

​افطاریءِ روزہ و حسنِ ملاقات

​سرکار کو آستانہ صابرؒ پر رہتے ہوئے تیئیس 23 ایام گزر چکے تھے۔ تیس دنوں سے روزہ تھا۔ شب و روز کے جنگ رہتے تھے۔ محنت شاقہ تھی۔ عبادات و ریاضات ہمہ وقت جاری تھیں۔ دیگر تمام ضروریاتِ زندگی کا فقدان تھا۔ تاہم وقت نہایت سکون سے بسر ہو رہا تھا۔ ایسے لگتا جیسے تمام جہان کی نعمتیں اور سعادتیں سمٹ کر سرکار کے حجرہ میں آگئی ہوں۔ جس سکون کی تلاش میں لوگ زندگیاں تلف کر دیتے ہیں، کبھی سیم و زر، کبھی شہرت، کبھی تاج و تخت کا سہارا لیتے ہیں مگر سکون کی دولت کسی طرح ہاتھ نہیں آتی۔ بیش بہا دولتِ سکون قلبِ صابر کے آستانہ مبارک پر عطا ہو رہی تھی۔ اپنے سے بے خبر غمِ دو جہاں سے بے نیاز یادِ یار میں گم وقت سکون سے گزر رہا تھا۔

​آج دربارِ عالیہ پر چوبیسواں دن تھا۔ سرکار صبح سویرے حجرہ میں بیٹھے دو پوسٹ کارڈ لکھ رہے تھے۔ ایک کلس شریف میں والد کے نام اور دوسرا موضوع ساہنا قبلہ مائی صاحبہ کے نام تحریر تھا۔ جن کا نفسِ مضمون ایک ہی تھا۔ کہ میں آستانہ صابر پر پہنچ چکا ہوں۔ سرکار کے قدموں میں نہایت سکون سے رہ رہا ہوں۔ حضور کی نوازشات جاری ہیں۔ جب اجازت ملی آجاؤں گا۔ ابھی دونوں خطوط پر پتے (Addresses) لکھنا باقی تھے۔ سائیں گلو پاس ہی بیٹھا حقہ پی رہا تھا۔ اچانک گلو نے دروازہ کی طرف تعجب خیز نظروں سے دیکھا اور اٹھ کھڑا ہوا۔ سرکار نے بھی دیکھا تو دروازہ پر ایک نورانی پرکشش سفید ریش خوبصورت چہرہ والی شخصیت کو کھڑے پایا۔ جو سفید لباس میں ملبوس سفید جوتا پہنے سر پر سوتی عمامہ سجائے ہاتھ میں عصا تھامے کھڑے تھے۔ سفید جوتے پر رائی بھر خاک نہ پڑی تھی۔ جیسے یہ ایک قدم بھی چل کر نہ آئے ہوں۔ کہیں آسمان سے نیچے اتر پڑے ہوں۔ سرکار با ادب اٹھے۔ مہمان کو اندر لائے۔ آنے والے نورانی بزرگ سامنے والی چٹائی پر خاموش بیٹھ گئے۔ خاموشی طاری تھی۔ مہمان کا جلال و جمال کا امتزاج ایسا اثر انداز ہوا کہ بولنے کی سکت نہ رہی۔ ع

​سرکار نے دل میں سوچا یہ خواب کا عالم ہے۔ بھلا ایسی لامثال شخصیت جس کے نورِ جبیں سے دل و جان منور ہو رہے ہیں، جاگتے میں کیسے نظر آتی ہے۔ میں کوئی بات کر لوں ورنہ بیدار ہونے پر افسوس ہوگا کہ میں نے کوئی بات نہ کی۔ دل میں کئی ارادے بنتے پھر دل ہی دل میں ٹوٹ جاتے۔ کہیں ایسا کہنا خلافِ ادب نہ ہو۔ آخر ہمت کر کے ایک نامکمل سوال عرض کیا کہ حضور آپ کی عمر کتنی ہے؟ سوال سن کر چہرہ پر خوبصورت سا تبسم اور دانتوں کی ستاروں جیسی چمک نمودار ہوئی۔ میٹھے انداز میں فرمایا اپنی عمر کا تو کیا کہنا۔ میری والدہ کی عمر تین صد ستر (370) برس ہے۔ ابھی پینا خود ہی کرتی ہے۔ جواب سن کر ذہن الجھا کہ یہ کیا معاملہ ہے کہ والدہ کی عمر تین صد ستر (370) برس ہے اور پینا خود ہی کرتی ہے۔ تاہم فوراً ذہن میں جواب آگیا کہ ہاں ہر مومن کی ماں شریعت ہے۔ سرکار نے عرض کی حضور میری بھی ماں تو وہی ہے۔ آپ مسکرائے، پیار سے تھپکی دی، 'میں ابھی آتا ہوں' کہہ کر درگاہ میں چلے گئے۔ تھوڑی دیر بعد تین موٹے موٹے مکھانے ہاتھ پر رکھ کر درگاہ سے واپس آگئے۔ اپنے ہاتھ سے ایک مکھانہ سرکار کے منہ میں ڈالا۔ فرمایا شاہ صاحب کھا جاؤ۔ دوسرا لٹو کو دیا اور تیسرا خود کھا لیا۔ پھر سرکار کی طرف مخاطب ہو کر فرمایا، آپ ابھی چلے جائیں۔ آپ کو اجازت ہو چکی ہے۔ آپ کا روزہ افطار ہو گیا ہے۔ سرکار نے عرض کی، میرا چالیس دن رہنے کا ارادہ تھا۔ فرمایا یہ گنتی کی جگہ نہیں۔ اگر ایک دن مزید رہو گے تو دیوانے ہو جاؤ گے۔ عرض کی اگر دیوانہ ہو گیا تو اچھا ہے۔ دنیا کے بکھیڑوں سے جان چھوٹ جائے گی۔ فرمایا نہیں، دیوانہ نامراد ہوتا ہے۔ جاؤ دنیا تمہارے ہاتھ سے فیض حاصل کرے گی۔ خواجہ خواجگان کا چشمہ فیض جاری ہوگا۔ نامراد مراد پائیں گے۔ دولتِ ایمان بڑھے گی۔ لو اب ہم جاتے ہیں۔ کہہ کر اٹھ کھڑے ہوئے۔ جب چلنے لگے تو سرکار سے وہ پوسٹ کارڈ لے لئے جن پر ابھی ایڈریس نہیں لکھے گئے تھے اور وہ کارڈ چغہ کی جیب میں ڈال لئے۔ خطوط اسی روز اپنے اپنے مکتوب الیہ کے پاس پہنچ گئے تھے۔ مہمان جب رخصت ہونے لگے تو لٹو اختر اما ہمراہ ہو لیا۔ آگے جا کر گلو کو فرمایا یہ تمہارے پیر و مرشد ہیں ان کی خوب خدمت کیا کرو۔ یہ خزانہ ہے، لوٹ لو۔ لٹو رخصت کر کے واپس آیا۔ کے آنے تک سرکار کی تیاری ہو چکی تھی۔ گلو فرمایا، گلو واپسی کے لئے رختِ سفر باندھ لو۔

​کلیر سے واپسی

​سائیں گلو کی کلیر میں رہتے رہتے درگاہ پاک کے خدام اور درویشوں سے کافی واقفیت ہو چکی تھی۔ اس نے سب دوستوں سے پروگرام بنا رکھا تھا کہ جب ہم واپس جائیں گے میں گولا چلاؤں گا۔ سب صابری فقیر اکٹھے ہو جائیں۔ نقار خانے کے آگے اور روضہ اقدس کے سامنے رقص ہوگا۔ بھیڑ بجے گی۔ صابر کے صدقے بٹیں گے۔ سرکار کو مل کر سب فقیر رخصت کریں گے۔ گُلو نے آج حسبِ وعدہ گولا چلایا۔ تمام صابری غلام اکٹھے ہو گئے۔ گُلو اور دیگر صابری مستوں نے مل کر رقص کیا۔ سرکار نے پہنے ہوئے کپڑوں تک سب کچھ خیرات کر دیا۔ صرف ایک کھیس تھا جس سے تن ڈھانپ لیا۔ آنکھیں اشکبار تھیں۔ محبوب کا دیس چھوڑنا مشکل نظر آرہا تھا۔ مگر بحکم صابرؔ آہستہ آہستہ واپسی کے لئے روانہ ہو لیے۔ نہر تک پیچھے پاؤں با ادب چلتے آئے۔ لوگ مل مل کر رخصت ہوتے رہے گرمی ہو چکی تھی۔ جسم کمزور و لاغر تھا۔ انتہائی نقاہت کی وجہ سے چند قدم چلتے پھر ستا لیتے۔ اچانک فضا میں خنکی آ گئی۔ بادل بنا، بوندیں شروع ہو گئیں۔ آپ اسی بوندا باندی میں رُڑکی پہنچ گئے۔

​عبدالجلیل کی ملاقات

​ریلوے اسٹیشن رُڑکی سامنے نظر آ رہا تھا۔ سرکار آہستہ آہستہ معہ گُلو چل رہے تھے۔ ایک شخص سڑک پر کھڑا نظر آیا۔ جو ہر آنے والے مسافر کو بغور دیکھ رہا تھا۔ سرکار پر نظر پڑی، جھک کر با ادب ملا۔ بڑی محبت سے اپنی سامنے والی دُکان پر تشریف لے چلنے کی عرض کی۔ دُکان پر بٹھا کر چائے سے تواضع کی۔ بعد میں ہاتھ جوڑ کر اپنا مدعا بیان کیا کہ حضور مجھے آج رات خواب میں ایک نوری بزرگ کی زیارت ہوئی۔ خواب میں آنے والے بزرگ کا حلیہ اور لباس وہی بتایا جس حلیہ کے بزرگ نے سرکار کو کلیر سے رخصت کیا تھا۔ انہوں نے فرمایا ہے صبح یہاں سے ایک پابرہنہ مسافر گزرے گا۔ تم اس کی خدمت کرنا۔ اس کی بیعت ہو جانا۔ تمہارا فیض ان کے پاس ہے۔ میں حسبِ حکم راستہ میں کھڑا تلاش کر رہا تھا۔ مجھے آپ وہی مسافر نظر آئے ہیں۔ لہٰذا میری بیعت کی اپیل قبول فرمائیں۔ سرکار نے فرمایا تیری خواب درست ہے کیونکہ ہمیں کلیر سے رخصت کرنے والے وہی بزرگ ہیں یہ آدمی عبدالجلیل نامی رُڑکی کا رہائشی تھا۔ ریلوے روڈ رُڑکی پر ہوٹل بنا رکھا تھا۔ یو، پی ہندوستان میں یہ ہمارا پہلا پیر بھائی تھا۔ سرکار کا لاہور تک گاڑی کا ٹکٹ خرید کر گاڑی پر بٹھا کر آیا۔ ​گاڑی مسافروں سے کھچا کھچ بھری ہوئی تھی۔ ہندو لوگ ہردوار یاترا کے بعد واپس آ رہے تھے۔ ڈبہ میں تل دھرنے کی جگہ نہ تھی۔ سائیں گُلو نے سیٹ پر لیٹے ہوئے ایک مسافر کی منت کی کہ ایک بیمار کے لئے بیٹھنے کی جگہ دے دو مگر وہ لوگ نہ مانے۔ سرکار اور گُلو ایک طرف کھڑے ہو گئے۔ گاڑی چل پڑی۔ جب اپنی پوری رفتار سے فراٹے بھرنے لگی، ڈبہ میں ہچکولے لگنے شروع ہو گئے۔ اتفاقاً ایک اوپر والی سیٹ پر سویا ہوا بھاری بھرکم مسافر نچلی سیٹ پر سو خواب عورت پر آ گرا۔ عورت چلائی، غل مچا، سارے ڈبہ میں بھگدڑ مچ گئی۔ آپس میں ایک دوسرے سے کہنے لگے یہ مسافر کوئی سادہ صفت معلوم ہوتے ہیں۔ ہم نے ان سے ناروا سلوک کر کے بے ادبی کی ہے۔ جس کی سزا ہمیں بھگوان نے دی ہے۔ اس طرح انہوں نے آپ کو بڑی منت سماجت سے راضی کیا۔ جگہ دی اور خدمت میں لگ گئے۔ یونہی لاہور تک واپسی کا سفر آسانی سے طے ہو گیا۔ لاہور آ کر اپنے غلام خاص خواجہ خان کے گھر گئے۔ اس نے آپ کا لباس تیار کرایا۔ دوسرے روز لاہور سے ملک وال آگئے۔ اس طرح واپسی ہوئی۔ جو کچھ صابر حضور نے دیا۔ دینے والا جانے یا لینے والا جانے۔
​اس سفر کے بعد حضور کے دست حق پرست سے فیوض و اکرام کے چشمے جاری ہو گئے۔ لاکھوں مایوس با مراد ہوئے اور لاکھوں چوروں ڈاکوؤں کو دولت ایمان ملی۔ اس کے بعد کلیر اپنا گھر نظر آنے لگا۔ ہماری سنگت کے کافی لوگ وہاں حاضری کے لئے جاتے۔ سرکار نے وہاں اپنے رہائشی مکانات تعمیر کرا دیئے۔ وہیں سال بھر ڈیرہ رہتا۔

متاعِ حیات

​محبت کا راستہ بڑی ہولناک اور کٹھن وادیوں سے گزرتا ہے۔ جہاں قدم قدم پر خاردار جھاڑیاں، پر پیچ راہیں، نوکیلے پتھر، پرہول چیخیں، خونخوار درندے منہ کھولے کھڑے ہیں۔ جو راہی کو ہڑپ کرنے کے درپے نظر آتے ہیں مگر راہِ سفر کا مسافر جب عزمِ صمیم لیکر قدم اٹھاتا ہے تو اسے ہر دشواری آسانی میں ڈھلتی نظر آتی ہے۔ بالو اور خشک ریگ سیاہ پھولوں کی سیج نظر آتی ہے۔ کانٹے خوشنما پھول بن جاتے ہیں۔ محبوب کی محبت کا مقناطیسی اثر عاشق کے ارادوں کو فولاد سے زیادہ مضبوط بنا دیتا ہے۔ دنیا و مافیہا سے بے پرواہ کر کے صرف ایک دھن میں مگن کر دیتا ہے اور عاشق کشاں کشاں اپنی منزل کی طرف کھنچا چلا جاتا ہے۔ علاوہ پاؤں میں نوکیلے پتھر چبھ گئے تھے جو آئندہ زندگی میں چلنے میں بڑی تکلیف دیتے تھے۔ اکثر اوقات پاؤں میں سخت چبھن محسوس ہوتی تھی۔

​کئی بار قدم دباتے ہوئے عرض کی حضور یہ نوکیلے پتھر گوشت کے اوپر والے حصہ میں ہیں۔ اگر اجازت ہو تو جراح معمولی سا نشتر لگا کر نکال دے تاکہ ہر روز کی تکلیف جاتی رہے، مگر ہر بار یہی جواب ملا کہ مجھے پتہ ہے یہ پتھر نکالنے میں کوئی تکلیف نہ ہو گی۔ یہ بہت آسان سا عمل جراحی ہے۔ مگر میں انہیں نکالنا نہیں چاہتا کیونکہ یہ میرے محبوب کے راستہ کی مقدس نشانیاں ہیں۔ میرے مشکل سفروں کے ساتھی ہیں۔ میں انہیں اپنے ساتھ قبر میں لے جانا چاہتا ہوں۔ آپ لوگ میری اس تکلیف کو محسوس نہ کیا کریں۔

وصال

​آج مورخہ ۲۴ نومبر ۱۹۷۳ء، ۲۹ شوال المکرم ۱۳۸۳ھ، ۱۱ ماگھ ۲۰۱۰ بکرمی بروز اتوار صبح صادق کا وقت تھا عشاق پر کوہِ غم ٹوٹ پڑا۔ سرگودھا سے کلس تک سفر خدا جانے کس حالت میں گزرا جنہیں الفاظ میں سمونا مشکل ہے۔ سرگودھا سے شام تک واپس کلس دربار آگئے۔ رات دربار پر گزاری۔ احباب رشتہ داروں اور عاشقوں کا جمِ غفیر اکٹھا ہو گیا تھا۔ اخبارات اور ریڈیو کے ذریعہ سرکارؒ کے وصال کی اطلاع پورے ملک میں پھیل گئی تھی۔ لوگ دیوانہ وار آرہے تھے۔

​نمازِ جنازہ

​اگلی صبح تقریباً نو بجے نمازِ جنازہ دربارِ عالی سے جنوب کی طرف کھلے میدان میں ادا کی گئی۔ نماز میں لوگوں کی تعداد کئی لاکھ کے قریب ہو چکی تھی۔ نمازِ جنازہ سرکارؒ کے خادم حافظ قاری صوفی امیر علی صابری نے پڑھائی۔ حافظ موصوف سرکارؒ کے مرید عاشق اور وفادار غلام ہیں۔ دربارِ عالیہ کی عزت کے خیر خواہ اور جاں نثار خادم ہیں۔ عبادت گزار اور نیک نفس انسان ہیں۔ ادیب، شاعر اور عاشقِ طبع ہیں۔ نہایت سمجھدار اور باادب ہیں۔ میرے وفادار ساتھیوں میں شامل ہیں۔ تقریباً ۴ بجے بعد دوپہر تک لوگ زیارت کرتے رہے۔ جوں جوں عاشق آتے، درود و سلام پڑھتے آخری زیارت سے مستفیض ہوتے رہے۔ تقریباً ۴ بجے شام کو سرکار کا دفینہ ہوا۔

​اگلی صبح ۲۶۔۱۱۔۱۹۷۳ء کو مزار مکمل ہوا اور مزار پر ایک حفاظتی مکان تعمیر ہو گیا۔ ۲۶ نومبر ۱۹۷۳ء کو ہی رسمِ قل ہوئی۔ اس موقع پر چہلم اور دستار بندی کی تاریخ مقرر ہوئی۔